تاريخكم أسود
تاريخكم أسود
ليه كل حاجه خابت وبقت ضلمه
ونحاول نبرر تملي حاجات لناس ظالمه
بقينا في دايره كالساعه ودنيا نارها لساعه
بنينا بيوت بعرقنا نصحى نلقيها متباعه
هدمتوا طموح شباب تعبت شباب مسكين
تبص في وش أجدع شاب..تلاقي وشه تملي حزين
مين خلى ست تشيل الهم وعلى خدودها نازلة تملي دموع
مين إللي كل ما تطالب بأبسط حق يقولك أقفل الموضوع
دا مش فاهم ودا مش دارس ودا يبقى من إياهم
وإن جيت تقول ظلم وحرام في القايمه تتحط وياهم
وتطلع ناس تقول ماشيه وبلدنا ياخويا زي الفل
أنزل أبص بعيوني ألاقيها ضاقت وخانقه الكل
كرهتونا في بلدنا وحببتونا في بلد غيرنا
كل ما نحط إيدينا على المسار بتغيروا خطوط سيرنا
بنعافر معاكم و بنحاول نعيش فيها لحد الأخر
أقول مهما حصل فينا دي بلدنا ترد عليا بكلام ساخر
بدلتوا وشوف كنا نقول دي نازله ملاك تنقظنا
جوعتونا وبنيتوا قصور وجاي تضحك وبتغيظنا
شيلتونا فوق حملنا حمل زودتوا على الهموم 100 هم
ياناس عيب وأختشوا ياخلق خلوا عندكوا دم
كله هري في كلام فاضي وشعب طول عمره بيتخم
مين قال مش فاهمين كلامكم.. ياخلق دا الكلام يتشم
زرعتوا الخوف في قلوبنا بدبابه. ورافع تملي سبابه
تتوعد لو نفتح الكلام.. مصيرنا يكون وجبه لديابه
تعليقات
إرسال تعليق