ليه يامصر

كل ما أبص في ملامحك ما أشوفش فيه غير الأحزان 

أوعي تصدقي إللي بيقولوا باعوها بأرخص الأتمان

ولا إللي يقول خلاص داخله أول مرحله من الجوع

مش بس أنتي إللي بتضحي ما كله بيتولد موجوع 

يمكن يكونوا بيعافروا عشان تفضالهم أحضانك

والله من قلبي حبيتك حتى في وقت أحزانك

وعايزه تكابري وتداري وتعملي ولا همك 

أضحك في وشك وأقول كدابه ما أنا ياما خدت من دمك

كنتي تشيلي وكنتي تدادي وعند لمسي بتسمي 

كنتي بترمي كتير ورا ضهرك وما تشليش غير همي

ياحضن دافي لولادك ليه عايزينوا يكون جافي 

كنت وقت ما اقول تعبت تقولي تعالى على كتافي

حامله فوق كتافك كتير حتى إللي طبطبتي عليه حبك

أقولك حاجه ومتزعليش حتى لو بعتينا مش ذنبك 

إحنا إللي مكانش فينا خير يحافظ على طيبتك 

إحنا إللي كنا شباب طايشين ومحترمناش في يوم هيبتك

وهضحك في وشك وأبتسم ماهو في الدنياماليش غيرك

ومهما أديكي من عمري ما هو برضوا كله من خيرك 

تعيشي يا مصر يا أم الدنيا يا مأكله الكل من عيشك

تعيشي يا مصر بقيادتك ويحمي يارب كمان جيشك

و إللي يقولك دي بايعينها كلمته ماركباشي 

من غيرك إنتي يا ست الكل ذره في الكون ما نسواشي