إستحاله
إستحاله
لمي ورقك وإرجعي إستحاله ليكي الرجوع
خدتي قلبي كان سليم رجعتيه كان موجوع
جايه بعد ضياع الوقت تألفي كام موضوع
مستحيل اخلي قلبك يعيش يوم على قلبي عاله
.......إستحاله
قلبي لما كان يحبك كان طيب حبتين
حبك لما شافك صافيه ونزلوا منك دمعتين
بس حبك كان مصالح وضحكتي عليه بكلمتين
لو بس فهمك مره واحده مكنش يوم ناقص قواله
......... إستحاله
كل مره كنت اسامحك واقول دي لسه دلعانه
ينطفي شوقها في ثانيه وانا إللي ناري ولعانه
ومن بحر حناني ياما سقيتك وكنتي ورده دبلانه
ولما عودك طاب واستوى بقيتي لغيري مياله
........ إستحاله
إللي قلبك مال ليه رسملك صوره في الخيال
قدر يضحك على قلبك وقولتي إنه في حبك ميال
الحب للناضج يابت الحب عمره ما كان لعيال
الخيل كتير وعلى ضهرها تشيل بس قليل الخياله
............ إستحاله
طول عمري كنت أداديكي لما فتح ربيع وردك
وأبتسم وقلبي يدق لما شوفت الأحمر على خدك
أديتك حب ما حبه قيس ودوقت المر على يدك
وجايه بعد ما الزمن هدك تنزلي عالواتس حاله
.......... إستحاله
رجوعك صفحه واتقفلت لو هتنزل دموعك دم
صفحتك قريتها كتير وماخدتش منها غير الغم
تجارب بنعيشها في الدنيا منها السعد ومنها الهم
والله لو كنتي بنت العم رجعوك ليا.. إستحاله
............ الشاعر احمد الحامدي........
تعليقات
إرسال تعليق