ستي أن أبوي

ستي أم ابوي بتحكي عن أمي

........

سلامات ياستي وكيف الحال

مساك ورد وحالي عال العال

أقعد في ريحي شويه لسه كنت عالبال

خير ياستي فيه حاجه مزعلاكي

لا يا كبدي كنت عايزه أحكيلك من أمك

احوالها ياكبدي إتغيرت معاي

لسه أمبارح كنت في سيرتك

إتعشيت والنبي مادقت الشاي

وستك كبيره ياكبدي مش قادره أقوم

والنبي ياواد ولدي ما عايزه احكي ياعيب الشوم

بس اقولك معاها إللي يردهولها لا يقومها ولا يقعدوها

دي بتجبلي اللقمه أكلها تشوف وشها تقول جيباها من بيت أبوها

أومال لو مكانش ليا معاش كانت رمتني في الشارع

دي خير جوزي إللي متمرمغه فيه

دا كان ابوك زمان يضربها كنت أنا إللي أقف ليه

وأزعق في ولدي وأضربه وكان ياكبدي عينه ماتترفعش من تحتيه

والنبي ياولد ماتزعل مني قولت احكيلك علي حاصل

وإن قالتلك ستك بتحكيلك على إيه ماجبلهاش سيره واصل

على حياة أبوك ياولدي ماكان يطلعلها حس ولاحتى تنبر نبر

زي بعضوا ياولدي ما أحنا خلاص رجلنا والقبر

أنا بس قولت أحكيلك لا تفكر أمك شيلاني شيل

دا بفرش فرشتي لنفسي والنبي مالقيالي حيل

وأنت ياكبدي كنت تعملي كل حاجه وتفتفتلي حتى العيش

والنبي ياكبدي ماحاسه حتى بطعم اللقمه من يوم مادخلت الجيش

هحكي كام من امك ياولدي والنبي مسخت وبقيت سم

زمان جدك قال لابوك بلاش منها محكمناش عواويل كانت بتلم

وابوك كان طايش في عز شبابه

وجدك سايبه يقولي دا لا يعرف حقيقه من حلم

.....

أنا زعلت على ستي ولقيت عيني لوحدها بتبكي

ليه ياما عمايلك دي وليه بس مزعله ستي

قالت حرمان ما ازعلها وشيلاها على راسي

 دي لسه أمبارح بتقولي ماخلفتش بنات بس أنتي بنتي

وأول ما قوم من النوم بكون فطارها محضراه

وأصحيها وأصبح عليها واعمل كل إللي عايزاه

ليه ياولدي دي ست كبيره انا بس إيه إللي خسرناه

معاي ياولدي عيال وإللي بعمله بكره هلقاه

لقيت أمي بتقولي السن الكبير مايتخدش عليه

وأنا بعمل إللي ربنا وصانا عليه وبكره هسمعك بودانك

وأنا مش زعلانه منها ولا بعمل كده عشان قدامك

بكره الصبح بدري هتسمع هي بتقول إيه

أمي قالتلي قوم عشان هصحي ستك من النوم

وتسمع كل كلمه بتقولها والله يا ولدي دي بركة البيت

قالت امي صباح الخير ياما أصحي عشان وقت الفطور

قالت ستي أسمالله عليكي يابنتي صباح النور

.....

كل يوم تعباكي معاي تحميني وتفطريني وبعدها تعمليلي الشاي

يخليلك يامي ولاداتك وتفرحي بيهم ويبارك في عمرك إللي جاي

عملتي الزين يابنتي معاي وعمرك في يم ماهنتيني

دا لو معاي بنت من بطني ماكنتشي شالتني زي ما شلتيني

فضلت أضحك على ستي واقول دي فعلاً بركة البيت

والله ياستي لو هوصف الحب غيرك أنتي ماحبيت

وجيت قاعد جنبها وطبطبت على يدها

وقولت ياستي ياست الكل إنتي والله عمود البيت

......... الشاعر احمد الحامدي...........