مدونة الشاعر أحمد خلف الحامدي

أشكيك لمين يازمن.. على همومك وأحوالك. أنا إللي ياما أسيت ولا حد قال مالك نصفت صنف الردي وأديته جميع مالك وزليت صنف الأصيل حتى في سؤالك مع إنه ولا يوم خاااااانك أصلك يازمن معروف بترسي الردي على البر تلبسه حرير حر وكل ما له ما يتغر  وخسفت بالأصيل الأرض وحاله بقي مايسر  بتكتم أنفاس الحر أما الردي مخليه على بالك

أنا مين  أنا إنسان ولا جماد ولا نبات  أنا الحلم إللى كله أهات  أنا المطيع وأنا الغلبان وأنا إللى كلى سكات  أنا الشقيان وأنا المحروم من حقى ليوم الممات  .. أنا مين  أنا إللى عدت عليا سنين مادوقتش فيها طعم الزاد  أنا إللى كل يوم أقول تتعدل أتاريها ملهاشى ميعاد  أنا أللى سافرت وياما كافحت وعمرى كله عدى وفات  أنا أللى ياما شربت عذاب ودلوقتى تقولى ماليشى أولاد .. أنا مين  حرام عليكى تطلع من بوقك بكره تقولى ماليش أحفاد  ماكنتش عايز أسمع منك دى قسوه منك ولا عناد  هو خيرك ليه لغيرك مش إحنا أولى من الغربه فى البلاد ولا عشان ضعيف وحنين . قوم تأجريلى جلاد  .. أنا مين  أنا إللى يوم ماغزوكى زمان أنا إللى كنت من قدام  أنا إللى رويت رملك بدمى . كانت حقيقه مش أحلام  أنا إللى ياما سهرت ليلك . رغم أنه كان كله ظلام  أنا جيشك وأنا نيلك .ماتبعينيش بحق إسمك فى القرآن  .. أنا مين  أنا حقى فيكى كل حاجه .. حرمانى ليه من كل حاجه  لما تحتاجينى بتلاقينى .. أبوس أرضك وأقول عباده  وأشيل روحى على كفى .. لا يهمنى...

الفساد عم البلد ونجومهم مسمعين والهز شغال تمام مره شمال ومره يمين والكبار عاطينها زاويه قال يعني مش شايفين وإللي تشوفهم بيصيفوا لأ عفوأ قصدي مشلحين وإللي إتصدروا المشاهد من ورا وقدام نافخين طب حد يقدر يقول ملايكه طبعاً دول شياطين وإللي معاه فلوس أهو عايش مامعهوش قاعد حزين  وإللي يفرسك لما يقولوا إحنا بنهز وشقيانين  وربنا بيباركلنا علشان فعلا مجتهدين  زمان طلعولنا برقصة كيكي ساعتها قالوا غلوا البنزين فا متزعلوش من سرسجي يرمي فلوسه في البيسين إزعلوا بس لما نموت وما نلاقوش تمن التكفين وبكره تيجي كيكي عبده وأهي من ضمن الفنانين  ويصطفوا وراها بهايم كان نفسي يكونوا مربوطين ويترشح السرسجي يخلوه نقيب الرقاصين

بيب بيب بيب بيب كان زمان سبع البرومبه أبو رأس زي الكرنبه راح فقعنا كام بومبه  وقال والله أنا الطبيب بيب بيب بيب بيب.. الجروح عارف علاجها والدواء وخداه في معادها  وبفتاكته أبو مخ كبير قام وجابها  وداس عليها مين بس يقوله سيب  بيب بيب بيب بيب  حكمه ليها كان أحلامه  ولا في يوم حد لامه  كله صدقه من كلامه  عرف يبصيها إبن  اللعيب  بيب بيب بيب بيب  قال جبنا جول ياحبايب وياللي حاضر وياللي غايب كل الشعب بقيلوا نايب  وهوب راح مغلي الأنابيب بيب بيب بيب بيب  قال أنا طول عمري محايد بغطس شويه وأطلع صايد  وهوب هدفه طلع أوفسايد وماخدنا منه غير التخريب  بيب بيب بيب بيب  يعني يغلي السولار  وبكيفه يلعب بالدولار  حكمها بالحديد والنار  وقالي أوسع مامعاك جيب  بيب بيب بيب بيب