عيال الحامدي

كان زمان في واحد أعرج يمشي ينقز من قريب

وكان فاكر من صفاره أنه أببض من الحليب

كان مجوز حرمه واحده وقال ليه ميكونش أتنين

هوب هي جمعها واحده وكانوا معاه الحرمتين 

القديمه غارت شويه والسبب بنتها بعرور

قالت اللي خدته القرعه تبقى تاخده أم الشعور

الجديده يا عيني ماتت ماكملتش ست شهور

القديمه عشان عبيطه قالت يلا للي يغور 

كانت فاكره شمت نفسها والسايب يصبح مربوط

أتاري أبو رجل واحده كان داير بين الشطوط 

راح دلوه على واحده كبيره تقدر تقول فايتها السوق 

فضل يتحنجل برجله و القديمه تقوله فوق

وهو نزل زي الأهطل كانه بيخمس في لحوق

الخلاصه هي جمعه وكان جايبها جوا البيت

القديمه قالت لو قعدت أبقى فعلا ما أتربيت

وهو أتاري بيغير بدل القديم يكون جديد 

هوب شويه سمعنا الخبر إنها حامل في عمجيد

عمجيد دا حكايته حكايه من مطلوعه تقول عفريت

تبص في وشه تقول داعمره حتى مش لاقي الفتيت 

يعني تقول عليه ممكن يكون شبه القردان 

وان وقف جنبك شويه تقول شوفوه ليكون جعان 

تشوف امه يوم ولادته تقول دي نجحت في إمتحان

هوب شويه وعايزه تأمن مستقبله لقدام 

فضلت تحور على الراجل وكل شويه عليه تنادي 

أول حاجه داست عليهم بالجزمه ياسين ثم ناجي

وتقول دا ولدي لسه صغير يدوب ياناس سن حداشر

قام الأعرج تبع كلامها وكتبله الزرعه إللي في تلاتاشر

نادي يقول حرام ليه يعمل كده طب ياناس مش إحنا أخوات

قولناله أسكت ياناجي داحتي قرض البنات 

وياسين يصرخ ويقول مش مسامحه ليوم الممات 

بصوا الخلاصه ياأولاد عمي هي لمت عالقرشنات

والشقق والأراضي وضيف عليهم المحلات 

هي دي أخرة أبوكم ورمحه ورا التقليه 

وبعد حبه يموت أبوكم ..وإللي تراضيكم حسنيه